COPE TOPA PAWLPI TE TAWH MISSION SUNDAY ZATKHOPNA:

Dear Zomi  Ulehnau,

Zomi te   hihciang dinmun  ituntheih nadingin itna leh lainatna lianpi tawh  na hongsem  Sangmangpa Cope Topa te biakinn Second Baptist Church of  Germantown  ah  Sept 16 ,2012 Mission Sunday ah Topa geelna tawh  hunnuamtakin  kangahtheihna  thu anuai abangin  kongit Zomi tetungah kongpulaak nuam hi.


Mangkang gam ah pawlpi tampitak  aom hangin  ei adingin itna tawh nahoih  hongsem te pawlpi  pen ilungtang sungah hongom pha deuh hi.
Tunung kum Sept  14 ,2011 nitak in  hunzangdingin  Philadelphia khuasunga  om Zomi pawlkhat tawh kapai uha  nitak kikhopna ah sermon hongnei sak uhhi.
Sermon manciangin   Rev.Flores Church Pastor  in maikum  Sept 16  ka Mission Sunday  uh ah  Speaker dingin  kongcial pah uhhi hongcih teh kalungdam mahmah in  lungkimna tawh kasang pah hi.

Pasian  lamhonsakna  tawh  Sept 12 ,2012 ni in Kanupa un  Nashville panin Philadelphia katung thei uha, Sia Thang Sian , Nu Mang leh Pa Kim ten mawtaw  nuam mahmah tawh vanleng tual ah hongdawn uhhi. Sia ThangSian in  honggenna ah,Topa aw  Sia PauKhai te nupa   vanleng tualpan ka mawtaw thak tawh dawnnuam mahmah ing ci in thu kangetleh Topa in kongdawn nadingin mawtaw thak hongpia  hi ci in Lungdamkohna thu honggen hi.Kalungdam lua hi.

Nitak thumsung Sia ThangSian te  inn bulphuh in Zomi omthei tengtawh  Lungdamna thutangkona  nuamtakin kanei thei uhhi.

Sept 16  Sunday niciangin Zomi ahithei tenginSia ThangSian te mawtaw leh Pa Nang Khan Khai te  mawtaw tawh hongpai pih uha, zingsang nai 10:00 AM hunin Cope Topa biakinn  mun katung ta uhhi. A Pastor  pa  Rev.Flores in  azumkhan sungpanin hongdawn khia in lungdamna tawh kikawi in  Lungdamna khitui hongluang hi. Hun kipat ma in   biakinn kim ah kavaak kawikawi uha, sangmangpa aphawkna uh  laisuanpi pen Biakinn sungah limtakin koih uh ahih manin  kasim  phot uha lungsim tawng  hongdeng mahmah hi.

Kumkhat in khatvei aneih uh hih Mission Sunday ah Kawlgam panin  kakhatvei sapna uhhi ciin hongpulaak in, Maikum  2013 ciangin Zomi te Zolai ineihzawh  kum 100 hongcing ta ding  hi a, hih ihZolai hongbawlsak pa'  hongpaikhiatna  pawlpi sung tektek ah    kum 99 acin kum in Lungdamna  thu genkik theidingin  kaomkhak pen kanuam mahmah a kadipngek   hong na mahmah  hi.Zomi bup   in Lungdamna akokik bangin hongngaihsun uhhi.Zong  kahi pah hi.

Hun paidan teng:

1.Hun kipat ding ciangin  Music hongkitum in tuasungin  Pastor pa tawh kogeel   honglut sak in damtakin   hongpai sak  masa uha  Church choir ten hongzui diamdiam uhhi.
2.Pulpit luahkhit ciangin  Assistant Pastor pa in   kipatna Laisiangtho hongsim masa hi.
3.Praise and worship   makai ten panmun hongla  in  tawlkhat sung Praise and worship hongmakaih uha  tha kingah mahmah hi.
4.Pawlpi sung naupangte adingin  atuam vilvel in thungetsakna nei masa in tuakhit ciangin naupangte  amau mun ah paisak uhhi.
5.Lengla kikhawm  khempeuh  Church Pastor  Flores  in vaimuakna  hongneih khit ciangin mikhempeuh  khut hongkilensak in  hong maitaisak kimciat  uhhi.
6.Siampi thungetsakna    hongnei inpawlpi sungah  thunget lunggulh mahmah ten  hongpulaak  in  thungetsakna hongnei hi.
7.Zomi akikhawm thei teng  Sia Thang Sian  makai in  " Lungsim leh aw inTopa  phatning" cihla  Cope Topa   hongbawlsak  lai leh la tawh hongsa nung ci in  hongsa uha mipi khempeuh in  thangah lua in khut beng ziahziah uhhi.
8.Pastor Flores thugenna :  Tuma kum 100 val lai in ei pawlpi panin  Kawlgam adingin  Khaici  ituhte tu in apo agah  imuh manin ilungdam hi ci in Khitui mualtuang sa in Lungdamna thu honggen khia a mipi khempeuh zong  daidide in tawmvei om uhhi.
9.Church Choir ah  akhangno pen kum 50 bang phadingin ka um a, thangah huai thei mahmah in la hoih nono hongsa uhhi.
10 .Ka thugenna :  Ka sermon thulu pen:  Akizonailo  Mission nasep  :,
      Ka thugen  te atom in: Mangkang gam ah pawlpi tampi tak aomhangin  No pawlpi ka it phadeuh uha paiding  kangak lah mahmah uhhi, ahangpen   No pawlpi in Ko Zomi te adingin  itna tawh  naneih sunsun uh humcip lo in Mission na nongsep man   uhhi ci in kapulaak masa  hi. Cope  hangin  ko  Lai anei kahi uha,  tuni in US gam ah pilna sangpi pi  kasintheihna uh pen  no pawlpi nasepna gah hi ci in lungdamkohna kanei masa a tha ngah  mahmah uhhi. Mailam ah   hihbangin Mission nasep pen  zom suaksuak  un khawlkei un  , leitungah  Khangkhat  bek inungta  dinga ahizongin Khangtampi sung ading  nahoih iseptheihna in Mission nasepna hi ci in  Topa mintawh tha kapia a, kalungdamna , kalungkimna leh mailam adingin   kalunggulhna  te kapulaak a Zomi aitangin   akisam bangin Topa mintawh kapulaak thei hi.
Sangmang pa Cope  pen asih zawh  asawt mahmah hangin  anahoih sep  te si thei hetlo  ahihna kaphawk mahmah hi.

Zomi ulehnau te aw,  nongthu ngetsakna hangun  Pasian hehpihna tawh  Lungdamkohna leh Lunggulh kohna Zomi aitangin  kapulaak theih manin  Pasian in mailam ah Zomi  hong makaih taktak ding in kalam en hi.

Kikhop manciangin   annekkhopna hongneih pihuha,  tuakawm in  Kawlgam leh Zogam Zomi te tawh kisai   dotnop aom bang bang hongdong uhhi.
Lungkim hua takin  hun khempeuh kazawh khit uh ciangin  man kizaih  in khut kilen in kaki khen diam diam uha ko zong  Zomi te mawtaw tawh  Zogam  zuan danin   Sia ThangSian ten  ka ciah uhhi.


Nitak  ciangin  Sia ThangSian ten  kikhopna kanei kik uha,  India pan hongpai  Dr.Suan te nupa zong kum khat sung   Research  bawldingin  hongpai uha  , hih bangin Zomi mipil  misiam ineih pen ilung hongdam mahmah  hi.


Pasian in hih laisim te tungah  athak  in sangmang thupha hongpia tahen,

Rev.Pau Khan Khai   te nupa

Philadelphia, USA  camp

src:: http://zominam.org/en/thuluite/zomi-thului/321-cope-topa-pawlpi-te-tawh-mission-sunday-zatkhopna.html