"FARISAI PA LEH SIAHDONG PA THUNGETNA

Farisai pa in ama puatham dikna,a thukham zuihzawhnate hang in,dik kisa in kiliatsakna kammalte zangin thungen a,"Pasian aw,keimah in mizawhthawh bawl a,sut ahi zong in,
mi thuman lo gamta ahi zong in,mi' zi tawh mawh thei mi tham lo in,hia siah dongpa bang ka hi kei hi.Nangma hehpihna ka phat hi.Keimah in ni sagih lakah ni nih an ka tang hi.Ka neih ka lam khempeuh sung pan sehsawm suah sehkhat ka khia hi," ci-in kisial in thungen hi.(Lk 18:11-12).


 Siahdongpa ahih leh amah leh amah mimawh mikhial ahih lamtak ki phawk/tel lua mahmah ahih manin gamlapi-ah ding-in vantung lam na ngawn en ngam loin a awm beeng a, kiniamkhiat tak in..,"Pasian aw,mawhnei keimah hong hehpih in," ci-in thungen hi(Lk 18:13).

Farisaipa in amah leh amah dik kisa hi.Tua bang mite in amau' hanciam tawmna tawh a hoih zo kisa uh a,mawhnei mi a hih lam uh ngaihsun kha lo uh hi.amau puatham hoihna,thukham zuihzawhnate bek a suang mite in a kilawm a kituak lo mi,Pasian huh ding hehpihna a kisap lam uh a kiphawk lo mite ahi uh hi.tua bang mite in,a puatham tawh biakna' mi hihnate suang in Pasian hehpihna kisam kisa lo uh hi.

Siahdongpa in a hih leh ama mawhna leh a gitlohnate kiphawk a,kisikkikna takpi tawh mawhmai nading ngen in,mawhna nusia-in Pasian kiang zuan hi.Siahdongpa in Pasian ta taktakte lim hong lak hi.bang hang hiam cih leh Jesu mahmah in a gen inah,"hihpa(Siahdongpa) in mawhmaisakna ngahin innah a ciah hi.Farisaipa in ahih leh,mawhmaisakna a ngah kei hi.Bang hang hiam na cih uh leh,amah leh amah a kiphat mi khempeuh in niamkhiatna angah ding hi.A kiniamkhiatte in minphatna a ngah ding uh hi," ci-in gen hi(Lk 18:14).

Tua ahih manin eite in,hih mi nihte(Farisaipa leh Siahdongpa) thungetna tungtawn in Pasian in a bangci mite thungetna za in,dawng hiam cih lungngai kawm in,Pasian tungah thu i ngen ding hi.

Mimawh,mikhial ahih lamtak kiphawk loin,kiliansak in thu angen mite' thungetna Pasian in dawng lo ding hi.
Mimawh,mikhial ahih lamtak kiphawk in,kisikkikna tak tawh kiniamkhiat takin thu a ngen mite thungetna Pasian in za-in,dawng ding hi.

Laisim mimal kim tungah Topa'n thupha hong pia ta hen.Amen!

David Tuang

src:: http://zominam.org/en/thuluite/zomi-thului/333-farisai-pa-leh-siahdong-pa-thungetna.html