Na Khat Na Sam Hi

Thupatna:


Tuni a Lai Siang-tho sim in pianngei bang ahi nawnlo khat om

{jcomments on} ahihna hong gen hi. Zotual tangthu sunga Cingkhup leh Ngambawm bang hong phawksak hi. Akhat tu leh, akhat adingin alehlam suak a, khat ading ann limpen, akhat adingin lungme peuh hi lel hi. Kingai mahmah napi uhin, angei abang lo khat om hi. Akisam khat om icih ciang, ahi ding bang, pianngei bang ahih lo man ahihi. Tua hi in, ahi ding bangin ilepkik masiah aki-sam khat hong om tawntung ding hilel hi.



Khangto maw Kiasuk:

Gam laka ataa humpi in, tupan kipan ann huam minsa bek neek hong kipan henla, lo sunga bawngtal in khai tuh ding hong kithawi leh, sing tunga tuang vasa in taamngai hong tum in, awsang awniam zui in la hongsa leh… pianngei ahihlo hangin khantona kici dinga, na hoih ahi hi.


    Ahizongin tuni a iLai Siangtho teel in tu-a igen tawh akilehbulh thu hong gen hi. Annlim leh annnel pen ane, Babylon gam uk Kumpi minthang Nebukhadnez-zer in, bawngtal lungsim nei in, gamlak ah hong gamta a, lopaa nek hong kipan hi. Mihon lak nuamsa nawn loin, gam lakah paikhiatsak lo hong phamawh hi.



Ahiding Bang Hi Nawnlo:


Mihingte pen tawmvei leitung leh tawntung vantung kalkak dingin hong kipiangsak ihi a, ahi zongin tawntung hun ding awlmawh manlozah dongin tawmvei nuntak ibuaipih hi. Tuazong ahi ding ibat nawnlona khat ahihi.


    Pasian tawh kilem in, na khempeuh azo dingin hong kipiangsak ihi a, ahi zongin Pasian tawh kilem dan ding nangawn ithei nawn kei hi. Tua ahihmanin inuntakna ah akisam khat om tawntung a, sapcing thei nawnlo hi.


    Tuni in leitung bup huamin khantona thu igen hi. Ahizongin, tua khantona langah siatna zong hong khang hi. Tuni a khangthakte ikizep dan mahmah zong enkik un! Pasal leh numei nangawn ki-khen thei nawnlo zah in ikithawi hi.


    Isammet bek zong ak lusuang nei ibang hi. Inek idawn zong damna ding tampi kawmkal ah, siat nading vive duhpen in nei tazen hi hang. Mihing tanghial bawngtal lungsim anei ihi! Aki-sam khat om in, angei ding ibang nawn kei hi.

Kiphawkkikna Kisam:


Hici bang bilbial lak pan, Nebukhadnezzer kumpipa in “vantung lam ka ento a, ka khuatheihna ahong tungkik hi” ci hi (n. 34). Tuni inzong tua kiphawkkikna, khuatheih kikna ikisam hi.


    Vantung lam dakto in, Topa’ lam a-ento mi in, tua khuaphawkna angahkik ding uhi. Tua khuaphawkna tawh kizom in, Nebukhadnezzer in “ka kumpi za, ka minthanna, le ka gam minthannate a hong kipiakik hi” aci hi (n. 36).


    Vantung lam, Topa kiang adakto mi in, ahi banga kiphawkkikna ngah dinga, tua ciangin abanah adim nuntakna in hong zui ding ahihi. Kumpi za maa ah, tunglam ki-ento masa a, minthanna mai ah Topa’ kiangpan khuaphawkna ikisam hi.

Thukhupna:


Tuni in iTopa Jesu in “tui le Kha Siangtho tawh” suahkik ding thu hong gen hi. Suak icih ciangin nuntak kipan cihna hi a, athak in inuntakna ki-panphakik ding cihna ahihi. Ahizongin tua suahkikna pen mihing’ kisaktawm tawh hi lo a, Pasian hong itna thu leh Ama’ Kha tha tawh nuntak kipan pha-kik ding cihna ahihi.


    Nai khat tai 30 anung huihpi in na thaltang lot, hatsak in, muitusak hi. Leilevan apiangsak Kha Siangtho hatna inzong, Ama’ huihnun tawh kizui in inuntakna tha hong hatsak zo ding ahi. Na nisim nuntakna ah Jesu, na Honpa leh na Topa taktak in nei inla, Kha tha tawh nuntak kisinkik dih in.


    Tua Pentecost Kha Siangtho in angei abang lo khempeuh hong khelsak in, acil sang inzong ahoihzaw, aphazaw nuntakna thak sungah hong lutpih ding hi. Nihvei suahkik ding akisam ihi.

Thang San Mung

src:: http://zominam.org/en/thuluite/zomi-thului/338-na-khat-na-sam-hi.html