ZOMI KISAP MAKAI HOIH maw? NUNGZUI HOIH maw?

Zomi sungah Pasian in hong zatsak makai leh mipilte gamtat, kalsuan, vaihawm, khualzinnate...etc a thuza masasa in Zomi groupmail {jcomments on}

te ah a man lang, a kicing, a zaknop theithei a puak kituh ding hi sa ing.




Mimal in ei muhdan tam ih at luat ciang makai te muhdan leh gelnate bei pahpah thei.

Makai pahtawi panpih siam kisin photphot lehang ih Zomi maban ki zom thei pan ding hi. Lampi khat tung ah ton photphot lehang ih maban ki gel khawm thei pan ding hi.

Makai a kitelsa te ong ginat kei luat lawmlawm vua leh lah a hunzui in makai thak ih telkik ngawn ding hi.

Makai sem thei ding ei a dangten tulaitaka makaite tha vapia kei leng ei makaih ding hun ding hong tung hak lua kha ding hi.

Mi makaihna ih zuih  siam masak kei leh ei makaihna ong zui nuam mi tam lo ding hi.

Makai kidawk masasa langpan mawk leng Zomi makai ding vantung pan ong kum hetlo dinga pi si aknote bangin ih mangthang taktak ding hi.

Zomi sungah makai thei ding mipil a hunzui in Pasian in hong pia napi mipi in ih zat siamloh manin a ki makaihlo minam ih suak zen hi.

Zomi bup a dingin in makai hoih tampi thakhat in kisam masalo a, nungzui hoih hih ding  tu mahmah in thakhat in kisam hi.

Nungzui muanhuai pa bek makai picing suak thei ding hi.

Ih makaite thapia ni, tawsawn ni, panpih ni... Mipi thalo tawh makaiten a sep ding bangmah omlo hi.

Makaite zong nang leh kei bangin cilehsa mah tawh hi, lungkia thanem thei hi. Makaite thahat thanem ding pen mipi tungah kinga masa pen hi.

Makai thanem a mipi thakhauh cih om ngeilo ahih manin makai na langbawl a leh mipi thanemna ding a bawl na hi dinga nang gamtang vet kei zaw lecin kipawlna ki lawhcing theizaw kha ding hi.

Hun sia sunga Lungsim puak zia ih laih theih ciang bek mithak kisuak a,  khantohna in ong zui thei pan hi.

Na zak thuhoh thupha te nanga dingin na lak kei a leh a lamite khangto in nang hong ki nusia lel ding hi.

ZOMI TE KISAP MAKAI HOIH KHAT PEN A DANG ZOMITE NUNGZUI HOIH SUAH MASAKNA TAWH IH NGAH LEL DINGA, TUA DUNG ZUI PHOT LENG MAKAI PANMUN KI TUH THEIH HONG HIPAN DING HI.

Itna, lainatna, veina, thukhualna leh gelkholh muhkholhna tawh....

JK Kam
Itna Leiba

src::http://zominam.org/en/thuluite/zomi-thului/325-zomi-kisap-makai-hoih-maw-nungzui-hoih-maw.html